Im Johr 1522 hot de Langraf Philipp vun Hesse, denn wo mer spärer aa de Großmiedische genonnt hot, oan vun soine Räd, Balthasar vun Weitolshause, aa Schraudebach genonnt, als Belounung fer geleistede Dinnste mim Kaff Rore beleehnt. Mitglierer vun de Familie Schraudebach häwwe spärer aa noch de Landgrafe als Omtmänner in Lischdeberg un als Offiziern gedient (Regiment Schraudebach).

Vun de grouße, veerseidische Hofouloach, die sisch die Schraudebachs Oufong vum 17. Jahrhunnerd owwerhalb vum Kaff häwwe baue losse, stäit ner noch des zwaageschossische Herrnhaus. Sei heidisch Form hots dorsch en Umbau 1785 erhoale, woubei de Trebbetorm, noch erkenndlisch dorsch die kloane Fensterschen, vollstännisch in de Baukörber oigeschlosse worn is.
De Landgraf Ludwisch VI. hot 1671 die Schraudebachs veoulasst, ihrn Besitz in Rore somt ehrne Reschde betreffend Froundiensde, Jagd, Fischerei, Wold und Waad gäije `s Hofgut in Gunnernhause oisedaasche. Zur selwe Zeid hot'er fer sisch in Wembach e Jagdschlessje un Stallunge fer soi Gail baue losse - offebar hot'er geern im Wold gejoacht. `S Hofgut in Rore hot'er erstemol in Zeitpacht an so äbschde Hofbeständer gewwe (Vigilius, Ferster Burghard Rainer, Hepprumer) un vun 1710 on in Erbpacht on Schorsch Höltzer.

Dorsch dem soin Schwiejersohn Maddin Schuchmonn, de Sohn vum Bieweraaer Hofbeständer, is'es Hofgut fer mehrere Generatione on die Familje Schuchmonn gange. Laut Brandkataster hot's Herrnhaus 1850 halwer em Schorsch Philipp Röder II. un em Willem Laudeschläijer geheerd. Denne ehr Noochkomme geheerds Hofhaus heit noch.

Text uff Hochdeitsch

Seitenanfang